http://sindhsangat.atspace.com/basicinfo/padhernamo/pnamo.gif

اسان سنڌي زبان جا اديب، شاعر، دانشور، مصور، فنڪار ۽ "سنڌي ادبي سنگت، سنڌ" جا ميمبر، سنڌي زبان، ادب، ثقافت ۽ تهذيب جا رکوالا آهيون.

اسان جو اهو ايمان آهي ته پاڪستان گهڻ قومي۽ گهڻ ثقافتي وحدتن جوملڪ آهي۽ انهن وحدتن جون زبانون هن ملڪ جون قومي زبانون آهن.

اسان ادب جي افاديت ان جي سماجي ڪارج ۽ عظيم انساني قدرن کي حاصل ڪرڻ لاءَ ان جي اهميت کان پوري ريت باخبر آهيون ،ان ڪري اسان ادب کي واندڪائي ءَ جي وندر ۽ ذهني عياشي نه، پر پنهنجي قوم ،عالمي امن۽ انسان ذات جي مجموعي ترقيء لاءِ هڪ اهم ذريعو سمجهون ٿا. اسان جي نظر ۾ اديب ،سماج جو اهم،ذميوار،باشعور ۽ عزت لائق فرد آهي. اسان کي سنڌي زبان ۽ ادب جي عظيم ۽ انفرادي ڪلاسيڪي ورثي تي فخر آهي ان ڪري اسان جي راء ۾ اهوضروري آهي ته جديد دور جو اديب ،پنهنجي انهيءَ ورثي جو اونهو مطالعو ڪري ،ان جي شاندار روايتن کي پنهنجوڪري اجاري اڳتي وٺي هلي. ان سان گڏوگڏ اسان ادب ۾ نون تجربن ۽ رجحانن جي اهميت کان پڻ واقف آهيون ۽ انهن جا حامي آهيون. اسان جي اها تمنا آهي ته سنڌي ادب ڪنهن به ريت ين الاقوامي معيار کان هيٺ نه هجي.

اسان جوبه سڄي دنيا جي اديبن جيان،اهو ايمان آهي ته سمورا ملڪي غير ملڪي ۽ بين الاقوامي مسئلا، حق، انصاف، صداقت، سهپ، رواداري، امن ۽ اتحاد جي اصولن موجب نبيريا وڃن. جن جي اپٽار گڏيل قومن جي پڌرنامي ۾ ڪيل آهي انسان جي تخليقي قوتن کي هيچ سمجهڻ، ڪنهن به قوم يا نسل کي ٻي قوم يا نسل کان مٿانهون ڀانئڻ يا ملڪ، مذهب، رنگ، ٻولي عقيدن جي مت ڀيد سبب انسانن جي وچ ۾ ويڇو وجهڻ، اسان جي نظر نه فقط غلط پر انسان ذات لاء هاڃيڪار پڻ آهي. اسان هر قسم جي ڦرلٽ، ڏاڍ ۽ ضمير ۽ زبان جي پابنديء جا مخالف آهيون

اسان پنهنجي شعور، فڪر۽ فن کي سدائين آزاد ۽ ڪٽرپڻي کان پري رکنداسين ۽ ڪنهن به قسم جي لالچ، دٻاءُ، خوف، تعصب، رک رکاءُ ۽ مصلحت آميزيء کان سواء پنهنجي ضمير جو اظهار ڪنداسين، ۽ اسان جو قلم انهن سڀني مقصدن لاء وقف رهندو، جن جو اظهار هن پڌرنامي ۾ ڪيل آهي.

(24 جنوري 1970ع واري سنڌ سنگت ڪائونسل جي سکر واري ميڙ ۾ منظور ڪيل هن پڌرنامي کي ٻيهر ترميمن ۽ سڌارن سان8 نومبر 1996ع تي سنڌ سنگت ڪائونسل جي حيدراباد واري اجلاس ۾ منظور ڪيو ويو).

http://sindhsangat.atspace.com/images/bar3.gif
 

واپس صفحو پهريون

اڳتي پڙهندا سنڌ سنگت سرگرميون

 

http://sindhsangat.atspace.com/images/broot.gif