عنايت حسين ڀٽي
ڀٽي، عنايت حسين: فنڪار عنايت حسين -ڀٽي- 1926ع ڌاري گجرات ۾ پيدا ٿيو. سندس خاندان 1941ع ۾ لاهور منتقل ٿي ويو هو. عنايت حسين ڀٽيءَ جي فنڪاراڻي زندگيءَ جي شروعات انهن ڏينهن ۾ ٿي، جڏهن گوالمنڊيءَ ۾ رهائش پذير هو. -جتي- کيس هڪ پاڙيسريءَ -ان- دور جي سينيما فوٽوگرافر جي -ڀاءُ- حميد، ماضيءَ جي مقبول اداڪار ۽ فلم ساز ”نذير“ سان ملايو. نذير، عنايت حسين ڀٽيءَ کي پنهنجي پنجابي فلم ”ڦيري“ لاءِ هڪ گاني ڳائڻ جي پيشڪش ڪئي. هن جو اهو پهريون فلمي گانو، ”اکيان لانوين نا، تي فير پڇتاوين نا“ هو. هن گاني جي ڌُن بابا چشتيءَ، 1948ع ۾ ٺاهي هئي. هن ”هير ۽ سيف الملوڪ“ڳائي وڏي شهرت حاصل ڪئي. 1955ع ۾ اداڪار طور پهرين فلم ’جلن‘ ۾ ڪم ڪيائين، جنهن جو هدايت ڪار اي حميد هو. عنايت حسين ڀٽيءَ جي هيري طور پهرين فلم ”هير“ هئي، جنهن ۾ هن جي هيروئن اداڪاره سورن لتا هئي. عنايت ڀٽيءَ جي عروج جو زمانو اهو هو، جڏهن هن ”چن مکنا“،”سجن پيارا“ ۽ ”جند جان“ نالي سان ٺهندڙ فلمن ۾ ڪم ڪيو. اهي ٽئي فلمون هڪٻئي پويان ڪامياب ويون ۽ هي شهرت جي بلنديءَ تي وڃي پهتو. عروج جي زماني ۾ ئي پنهنجي مرحومه والده جي نالي سان گلاب ديوي ۽ گنگارام اسپتال ۾ ٻه وارڊ ٺهرايائين. تمام شريف طبع -انسان- هو. پنهنجي پوري فلمي دور ۾ ڪنهن به اسڪينڊل جو نشانو نه بڻيو. فلمي دنيا ۾ اچڻ کان اڳ هيءَ اسٽيج جو فنڪار هو ۽ چمٽو وڄائيندو هو. کيس مذهب سان به گھڻو چاهه هوندو هو ۽ ذاڪر هو. ٽيليوزن تي اسٽيج شو ”ڀٽي دا پهلا ڊيرا“ ۽ ”اجلا“ شو جي ڪمپيئرنگ به ڪيائين. هي ايم. اي اسلاميات هو ۽ اڪثر اخبارن ۾ مضمون به لکندو هو. 31 مئي 1999ع ۾ گذاري ويو.
05-31